Date Archives December 2019

DIL SE EK DUA HAI NIKLI

HerStory

© Dr. Aparna Govil Bhasker

Dil se ek dua hai nikli,
Ki har khwaish teri ho puri,

Chand aur sitare ho sarey tere,
Har khushi aye hisse hamesha tere,
Chu le tu har unchai ko,
Na roke koi raste mein tujhko,

Dil se ek dua hai nikli,
Ki har khwaish teri ho puri,

Har mushkil teri ho asaan,
Har rukavat ka mitein nishan,
Har dil tujhko chahe or pyaar kare,
Har ranjish se tu door rahe,

Dil se ek dua hai nikli,
Ki har khwaish teri ho puri,

Lekin yeh baat hai samajhne wali,
Ki jo khwaish na hoti hai puri,
Jo reh jati hai adhoori,
Woh hi sikhati hai sabak sabse zaroori,

Dil se dua to hamesha yahi niklegi,
Ki har khwaish ho teri puri,
Magar jo na ho aisa,
To na hona tu gamgeen,
Yehi banata hai zindagi ko rangeen,
Aur kabhi kabhi thoda sa namkeen

Isliye jo kabhi teri khwaish na hui puri,
Tu na manana har, kyunki
Yeh hoga zindagi me bar bar,
Fir bhi tu himmat bilkul na harna,
Har chunauti ko lalkarna,

Kyunki tabhi hai maza jeene ka,
Jab har khwaish na hoti hai puri.

© Dr. Aparna Govil Bhasker

AAJKAL AKHBAR KHOLNE KO JI NAHI KARTA

HerStory

AAJKAL AKHBAR KHOLNE KO JI NAHI KARTA

© Dr. Aparna Govil Bhasker

Aajkal akhbar kholne ka ji nahi karta,

Umar chahe paanch ki ho ya pachaas ki,
Rang chahe gora ho ya kaala,
Anpadh ho ya padhi likhi,
Shadishuda ho ya nahi,
Kisi se koi farak nahi padta.

Aajkal akhbar kholne ka ji nahi karta,

Ek Jyoti thi, ek hui Priyanka
Beech me na jane kitni thi Anamika,
Hindu thi, ya Isai, ya thi musalman,
Khoon to baha tha lal hi sabka,

Aajkal akhbar kholne ka ji nahi karta,

Yeh khabrein ab khabrein na rahi,
Pehle panne par netaon ka hai raj,
Pachven panne par dhoondne par nazar kabhi pad jati hai,
Kyunki khabar yeh chapti hai to desh ka gaurav hota hai kam,
Yeh khabar kahin kisi aur desh ke log na padh le, yeh soch ke bhi humko aati hai sharm,
Akhir natija hai yeh sab western culture ka,
Isme badi kya baat hai, yeh to sare jag me hota hai,

Aajkal akhbar kholne ka ji nahi karta,

Kyunki abhi to chita bhi nahi hui hai thandi,
Par hamare aakrosh ka graph aa gaya hai neeche,
Thak gaye hain hum #Rape ke bare me sun sun ke,
Bahut ho gaya, ab routine me vapas jana hai,
Akhir humko bhi to ghar chalana hai,

Aajkal akhbar kholne ko ji nahi karta,

Hamare paas nahi hai vakt,
Na hi yeh hamari hai problem,
Priyanka ke maa baap ab kaatenge court ke chakkar,
Saalon nikal jayenge,
Aur isko bhi hum dharm ka issue banayenge,
Vote jodenge, election issue banayenge,
Jab zaroorat hogi, tab mudda uthayenge,

Aajkal akhbar kholne ka ji nahi karta,

Mombattiyan jalti rahengi, petitions filon me padi rahengi,
Kuch salon bad fir ek aur Priyanka hogi ek aur Jyoti hogi,
Kya maloom woh masoom kaun hogi,
Hum fir se aakrosh dikhayenge or fir so jayenge,

Kab tak yeh silsila yuhin chalta rahega,
Kab rapist ko dand milega,
Kab badlega yeh system,
Kab hoga yeh sab khatam,

Aajkal akhbar kholne ka ji nahi karta……

©Dr. Aparna Govil Bhasker